طريقة الاستخدام

اختر اللي عندك، ونشرح لك خطوة بخطوة.

لصقات الخشم
اضغط للشرح

خمس خطوات، تأخذ منك دقيقة. وتحتها: كيف تشيلها، ووش تسوي لو ما ثبتت معك أو صار احمرار.

1 افتح اللصقة

ورقة الحماية على ظهر اللصقة، مقسومة نصين: كل نص ينشال لحاله

ورقة الحماية مقسومة نصين. ابدأ من النص، وشيل كل نص لحاله.

لا تلمس الجهة اللاصقة، ولا تشد اللصقة وأنت تشيل الورقة.

2 جهز خشمك

اغسل خشمك وجففه زين

اغسل خشمك بغسول خفيف بدون مرطب، وجففه زين. لازم يكون ناشف تماما.

اللاصق ما يمسك على بشرة رطبة أو فيها دهون.

بدون كريم

لا كريم ولا زيت ولا واقي شمس قبلها. ولا تلصقها بعد شور حار مباشرة.

3 حطها فوق أرنبة خشمك

مكان اللصقة الصح: فوق أرنبة الخشم مباشرة

الأرنبة هي الجزء الطري المدور في رأس خشمك. حط اللصقة فوقها مباشرة، مو عليها، وبالنص. وأطرافها تنزل على جوانب خشمك.

لصقة سودا في مكانها فوق أرنبة الخشم مباشرة، وأطرافها نازلة على الجانبين
كذا شكلها وهي في مكانها.
غلط: مرتفعة زيادة أو نازلة على فتحات الخشم
✗ مرتفعة زيادة ✗ نازلة زيادة

4 اضغط 30 ثانية

اضغط على اللصقة كلها ثم على الأطراف 30 ثانية

اضغط على اللصقة كلها الأول، وبعدين على الأطراف. 30 ثانية كاملة.

لا تشد اللصقة وأنت تلصقها. الشد ما يزيد الثبات.

5 خلها بحالها

بعد اللصق: لا تعيد الضغط ولا تبللها

بعد ما تلصقها: لا تضغطها مرة ثانية، ولا تعدل مكانها، ولا تبللها.

حطها قبل النوم أو التمرين بشوي.


كيف تشيلها

طريقة الشيل على الخشم: بللها، فك طرف واحد، ثبت الجلد، واطو الطرف واسحبها قريبة من الجلد
  1. بللها بموية دافية وأنت تغسل وجهك أو في الشور.
  2. فك طرف واحد بهدوء.
  3. ثبت الجلد بيدك الثانية.
  4. اطو الطرف على نفسه، واسحبها بهدوء قريبة من الجلد، مو لفوق.
غلط: سحبة وحدة لفوق وهي ناشفة

لا تشيلها بسحبة وحدة لفوق وهي ناشفة.

إذا بقي لاصق على خشمك، نظفه بموية دافية بدون فرك. ولو ما راح، كلمنا.
اللصقة تستعمل مرة وحدة. بعد ما تشيلها يضعف لاصقها.

إذا صار احمرار

أثر خفيف يروح بعد شوي عادي، وأثر يبقى يعني وقف
يروح بعد شوي يبقى، أو معه حكة أو حرقة

أثر خفيف يروح بعد ما تشيلها بشوي، هذا شي عادي.

إذا بقي الأثر، أو صار جرح أو تقشر، أو حسيت بحكة أو حرقة، وقفها وكلمنا.

ولا تحط لصقة جديدة على جلد مجروح أو متقشر لين يرجع طبيعي.


صار معك شي ثاني؟

ما ثبتت، أو طاحت وأنا نايم

المرة الجاية:

  • خل خشمك ناشف تماما قبلها، بدون كريم ولا زيت.
  • لو بشرتك دهنية، اغسل خشمك بالغسول قبلها مباشرة وجففه زين.
  • لا تشد اللصقة وأنت تلصقها.
  • اضغط 30 ثانية كاملة، على اللصقة كلها وعلى الأطراف.
  • لا تلمسها ولا تبللها بعد ما تلصقها.

ولو طاحت، لا ترجع تلصقها. حط وحدة جديدة.

سويت كل هذا وما ثبتت؟ كلمنا، نبي نعرف وش صار.

وين أرنبة خشمي بالضبط؟

حط إصبعك على رأس خشمك. الجزء الطري المدور اللي تحسه هو الأرنبة. اللصقة تجي فوقه مباشرة، مو عليه.

ما حسيت بفرق

جربها كم ليلة.

وبريث ما تضبط مع الكل، وهذي الحقيقة. لو ما فرقت معك، كلمنا.

وإذا مشكلة التنفس من زمان، أو أحد لاحظ إن النفس يوقف وقت النوم، الأحسن زيارة دكتور.

جهة وحدة من اللصقة تنفك

تأكد إن اللصقة بالنص والطرفين متساويين، واضغط على الأطراف آخر شي.

جهة وحدة من خشمي مسكرة حتى مع اللصقة

الخشم يشتغل بالتناوب، جهة تضيق وجهة تفتح ويتبادلون خلال الليل، ويصير للكل. بريث ما تتحكم بهالتبادل، هي تشتغل من برا على الجهتين.

ولو جهة مسكرة دايم، الأحسن تراجع دكتور.

أحس بضغط على عظمة خشمي

لا تشد اللصقة وأنت تلصقها. حطها على خشمك بدون شد، وبعدين اضغط.

لو استمر الضغط أو صار ألم، شيلها وكلمنا.

بقي لاصق على خشمي

نظفه بموية دافية بدون فرك. ولو ما راح، كلمنا.

أقدر أستخدم اللصقة أكثر من مرة؟

لا. اللصقة تستعمل مرة وحدة، بعد ما تشيلها يضعف لاصقها.

كم ساعة أخليها؟

أقصى شي 8 ساعات. حطها قبل النوم وشيلها أول ما تصحى.

أحط كريم على خشمي؟

قبل اللصقة لا. بعد ما تشيلها عادي، بس اغسل خشمك قبل اللصقة الجاية.

الشفاف والسبورت، الطريقة تختلف؟

نفس الخطوات للنوعين. السبورت حطه قبل التمرين وخشمك ناشف، وينفع للنوم بعد.

اللصقة تكبر الخشم؟

لا، ما تكبر الخشم. وأول ما تفكها يرجع زي ما هو.

ما ضبطت معك؟

كلمنا، نبي نعرف وش صار.

كلمنا واتساب

للاستخدام الخارجي فقط · تستعمل مرة واحدة · تحفظ بعيدا عن متناول الأطفال

لصقة الفم
اضغط للشرح

أربع خطوات قبل النوم، وتحتها: كيف تشيلها الصبح، ومتى ما تلصق فمك، وأجوبة أسئلتكم.

قبل تبدأ: سكر فمك وتنفس من خشمك دقيقة. مرتاح؟ الصقها. ضاق عليك؟ ما تلصقها الليلة، وابدأ بلصقة الخشم.

1 نظف ونشف

نظف ونشف حول شفايفك

خل حول شفايفك نظيف وناشف مكان اللصقة، بدون كريم أو مرطب. والباقي من وجهك عادي.

2 افتح اللصقة

اسحب طرفي اللصقة للجوانب، وورقة الحماية تنفتح من النص

امسك اللصقة من طرفينها واسحبها للجوانب، وورقة الحماية اللي ورا تنفتح من النص. بعدين شيل كل نص لحاله.

لا تلمس الجهة اللاصقة.

3 الصقها بالعرض

الصقها بالعرض والفتحة على نص فمك

سكر فمك بشكل طبيعي، والصقها بالعرض والفتحة على نص فمك.

لصقة الفم من بريث على الشفايف بالعرض، والفتحة بالنص
كذا شكلها وهي في مكانها.

4 اضغط ونام

اضغط عليها ثواني عشان تثبت

اضغط عليها ثواني عشان تثبت، ونام.

أول مرة؟ أول كم ليلة البسها 20 دقيقة وأنت صاحي قبل النوم، ولما ترتاح عليها نام فيها.


الصبح، كيف تشيلها

الصبح: شيلها ببطء من فوق لتحت، وقريبة من الجلد

شيلها ببطء من فوق لتحت، وقريبة من الجلد. ولو حسيتها ماسكة، بلها بشوية موية دافية.

لو بقي شي من اللاصق، اغسله بغسول الوجه. ومرطب الشفايف حطه بعد ما تشيلها.

متى ما تلصق فمك

  • إذا خشمك مسكر، أو عندك زكام أو حساسية بالخشم.
  • إذا خشمك ما ينفتح إلا ببخاخ الخشم.
  • إذا تحس بغثيان أو ممكن تستفرغ، أو عندك ارتجاع أو حموضة بالليل.
  • إذا تجيك نوبات هلع أو قلق قوي.
  • إذا أخذت منوم، أو دواء حساسية أو زكام ينومك، أو أي شي يخلي نومك ثقيل.
  • إذا عمرك أقل من 12 سنة، أو لأي أحد ما يقدر يشيلها بنفسه.
  • إذا عندك جرح أو احمرار أو تهيج بالجلد مكان اللصق.
  • إذا عندك حساسية من البلاستر أو الشريط الطبي.
  • بعد عملية بالخشم أو الفم أو الوجه: لين يسمح لك طبيبك.
  • إذا عندك مشكلة بالتنفس أو القلب، أو لوز أو لحمية كبيرة، أو انقطاع نفس وقت النوم: راجع طبيبك قبل.
  • إذا كنتي حامل: استشيري طبيبتك قبل الاستخدام.

إذا حسيت بضيق أو انزعاج، شيلها فورا. ولو طاحت لصقة الخشم بالليل وضاق خشمك، شيل لصقة الفم.

لصقة الفم مو علاج لأي حالة. كل اللي تسويه إنها تخلي شفايفك مسكرة بلطف وتساعدك تتنفس من خشمك أكثر وقت النوم.


أسئلة تجينا كثير

بختنق؟

اللصقة للي خشمه مفتوح ويتنفس منه براحة، وتشيلها بثانية لو ضاق عليك. ومو مقفلة على فمك كله، بالنص فتحة صغيرة.

قبل تلصقها سكر فمك وتنفس من خشمك دقيقة، وإذا ضاق عليك ما تلصقها الليلة. وأول كم ليلة جربها 20 دقيقة وأنت صاحي.

تطيح بالليل؟ وكيف أخليها تثبت؟

عشان تثبت: بشرة نظيفة وناشفة، بدون كريم أو مرطب مكان اللصق، واضغط عليها ثواني. ولو تتعرق بالليل خل غرفتك باردة.

ولو طاحت، نشف المكان والصق وحدة جديدة.

عندي شنب ولحية؟

جربها أول مرة 20 دقيقة وأنت صاحي، وشوف كيف تثبت على شنبك. والصبح بلها بشوية موية دافية، وشيلها ببطء من فوق لتحت وقريبة من الجلد.

آخذ منوم أو دواء ينومني؟

الليلة اللي تاخذ فيها منوم أو أي دواء ينومك، ما تلصقها. وإذا تاخذه كل ليلة، لصقة الفم مو مناسبة لك.

عندي انقطاع نفس وقت النوم أو أستخدم جهاز السي باب؟

ما تستخدمها قبل ما تستشير طبيبك. وإذا تستخدم جهاز السي باب بالليل، اسأل طبيبك عن لصقة الفم بالتحديد.

بشرتي حساسة؟

جربها ساعة بالنهار قبل أول ليلة. وإذا طلع احمرار أو حكة، شيلها ووقفها. وإذا استمر الاحمرار، كلم الصيدلي.

تترك علامة أو بقايا لاصق؟

لو بقي شي من اللاصق اغسله بغسول الوجه. ولو طلع احمرار وما راح، وقفها وكلم الصيدلي.

لو عطشت بالليل؟

شيلها، اشرب، والصق وحدة جديدة.

أحط كريمي الليلي أو مرطب الشفايف؟

حط كريمك على وجهك عادي، بس خل حول شفايفك نظيف وناشف مكان اللصقة عشان تثبت. ومرطب الشفايف حطه الصبح بعد ما تشيلها.

كم ليلة لين أتعود عليها؟

أول كم ليلة البسها 20 دقيقة وأنت صاحي قبل النوم، ولما ترتاح عليها نام فيها.

أحتاج لصقة الخشم بعد؟

إذا خشمك مريح بالليل بدون لصقة، لصقة الفم بروحها تكفيك. وإذا خشمك يتسكر، ابدأ بلصقة الخشم، ولما ترتاح فيها البس الثنتين بنفس الليلة: لصقة الخشم أول، بعدها لصقة الفم.

وش علاقتها بالشخير؟

لصقة الفم مو علاج للشخير، وما نقدر نوعدك بنتيجة فيه. اللي تسويه: تخلي شفايفك مسكرة بلطف وأنت نايم، وتساعدك تتنفس من خشمك أكثر.

وإذا شخيرك قوي، أو اللي جنبك لاحظ إن نفسك يوقف، أو تحس بنعاس قوي بالنهار، اكشف عند طبيب قبل تستخدم لصقة الفم.

تنفع للأطفال؟ وللحامل؟

لصقة الفم للي عمرهم 12 سنة وفوق. وما تنفع لأي أحد ما يقدر يشيلها بنفسه. وإذا كنتي حامل، استشيري طبيبتك قبل الاستخدام.

ما ضبطت معك؟

كلمنا، نبي نعرف وش صار.

كلمنا واتساب

للاستخدام الخارجي فقط · لصقة وحدة لكل ليلة · تحفظ بعيدا عن متناول الأطفال